(ភ្នំពេញ)៖ តើអ្នកដឹងទេថា មានមេដឹកនាំនយោបាយមួយចំនួននៅលើពិភពលោក ទទួលបានប្រាក់បៀវត្សប្រចាំឆ្នាំរាប់សែនដុល្លារ ខណៈមេដឹកនាំមួយរូប អាចទទួលបានជិត ៣លានដុល្លារអាម៉េរិកក្នុងមួយឆ្នាំ?

យោងតាមទិន្នន័យប្រាក់បៀវត្សនយោបាយអន្តរជាតិ ដែលត្រូវបានចុះផ្សាយថ្មីៗនេះ មេដឹកនាំកំពូលទាំង១០ គិតត្រឹមខែកញ្ញា ឆ្នាំ២០២៦ មានដូចខាងក្រោម៖

១. លោក Lawrence Wong នាយករដ្ឋមន្ត្រីសិង្ហបុរី

ចាប់ពីថ្ងៃទី១៥ ខែតុលា ឆ្នាំ២០២៦ ប្រាក់បៀវត្សប្រចាំឆ្នាំរបស់លោក កើនពីប្រមាណ ២.២លានដុល្លារសិង្ហបុរី ទៅ ៣.៦លានដុល្លារសិង្ហបុរី ឬប្រមាណ ២.៨៥លានដុល្លារអាម៉េរិក។ នេះជាការកើនឡើងប្រហែល ៦៤%។ គួរឱ្យចាប់អារម្មណ៍ លោក Wong បានប្រកាសថា លោកនឹងបរិច្ចាគ ប្រាក់ដែលកើនឡើងពីការដំឡើងប្រាក់បៀវត្សនេះ ទៅសកម្មភាពសប្បុរសធម៌ក្នុងរយៈពេល៥ឆ្នាំ។

២. លោក John Lee ប្រធានរដ្ឋបាលហុងកុង

ប្រាក់បៀវត្សប្រចាំឆ្នាំរបស់ប្រធានរដ្ឋបាលហុងកុង មានប្រមាណ ៧១៩,០០០ដុល្លារ។

៣. លោក Guy Parmelin ប្រធានសហព័ន្ធស្វីស

លោកមានប្រាក់ចំណូល ប្រមាណ ៦០៦,០០០ដុល្លារ/ឆ្នាំ។ ប្រព័ន្ធនយោបាយស្វីសមានលក្ខណៈពិសេស ដោយតំណែងប្រធានសហព័ន្ធត្រូវបាន ប្តូរវេនជារៀងរាល់ឆ្នាំ ក្នុងចំណោមសមាជិកទាំង៧នៃ Federal Council។

៤. លោក Anthony Albanese នាយករដ្ឋមន្ត្រីអូស្ត្រាលី

ប្រាក់បៀវត្សរបស់នាយករដ្ឋមន្ត្រីអូស្ត្រាលី ស្ថិតនៅប្រមាណ ៤៣១,០០០ដុល្លារ ក្នុងមួយឆ្នាំ។ ការកំណត់ប្រាក់បៀវត្សសមាជិកសភា និងមន្ត្រីជាន់ខ្ពស់ ត្រូវបានធ្វើឡើងតាមប្រព័ន្ធរបស់ Remuneration Tribunal ដែលជាស្ថាប័នឯករាជ្យ។

៥. លោក Donald Trump ប្រធានាធិបតីសហរដ្ឋអាម៉េរិក

ប្រធានាធិបតីអាម៉េរិកទទួលបានប្រាក់បៀវត្សផ្លូវការ ៤០០,០០០ដុល្លារ ក្នុងមួយឆ្នាំ។ ចំនួននេះនៅតែជាប្រាក់បៀវត្សផ្លូវការរបស់តំណែងប្រធានាធិបតី ខណៈប្រាក់ចំណូល ឬទ្រព្យសម្បត្តិផ្ទាល់ខ្លួនរបស់ប្រធានាធិបតី មិនត្រូវបានរាប់បញ្ចូលក្នុងតួលេខនេះទេ។

៦. លោក Friedrich Merz អធិការបតីអាល្លឺម៉ង់

អធិការបតីអាល្លឺម៉ង់ ស្ថិតនៅលេខ៦ ជាមួយប្រាក់បៀវត្សប្រមាណ ៣៦៦,០០០ដុល្លារ ក្នុងមួយឆ្នាំ។

៧. លោក Christian Stocker អធិការបតីអូទ្រីស

អធិការបតីអូទ្រីស ទទួលបានប្រមាណ ៣២៦,០០០ដុល្លារ ក្នុងមួយឆ្នាំ។

៨. លោកស្រី Mette Frederiksen នាយករដ្ឋមន្ត្រីដាណឺម៉ាក

នាយករដ្ឋមន្ត្រីដាណឺម៉ាក មានប្រាក់បៀវត្សប្រមាណ ៣០៩,០០០ដុល្លារ ក្នុងមួយឆ្នាំ។

៩. លោក Jens-Frederik Nielsen នាយករដ្ឋមន្ត្រី Greenland

តំណែងនាយករដ្ឋមន្ត្រីទទួលបានប្រមាណ ៣០៩,០០០ដុល្លារ ក្នុងមួយឆ្នាំ។ គួរបញ្ជាក់ថា Greenland មិនមែនជារដ្ឋអធិបតេយ្យឯករាជ្យទេ ប៉ុន្តែជាដែនដីស្វយ័តក្នុងព្រះរាជាណាចក្រដាណឺម៉ាក។

១០. លោក Bart De Wever នាយករដ្ឋមន្ត្រីបែលហ្ស៊ិក

នាយករដ្ឋមន្ត្រីបែលហ្ស៊ិក មានប្រាក់បៀវត្សប្រមាណ ៣០៧,០០០ដុល្លារ ក្នុងមួយឆ្នាំ។

សូមជម្រាបថា បើប្រៀបធៀប លោក Lawrence Wong ជាមួយលោក Donald Trump នោះប្រាក់បៀវត្សប្រចាំឆ្នាំរបស់នាយករដ្ឋមន្ត្រីសិង្ហបុរី បន្ទាប់ពីការដំឡើងនៅខែតុលា ឆ្នាំ២០២៦ នឹងមានចំនួន ជាង ៧ដង នៃប្រាក់បៀវត្សផ្លូវការរបស់ប្រធានាធិបតីអាម៉េរិករូបនេះ។

សិង្ហបុរីពន្យល់ថា ប្រព័ន្ធប្រាក់បៀវត្សខ្ពស់សម្រាប់មន្ត្រីនយោបាយ មានគោលបំណងជួយ ទាក់ទាញអ្នកមានសមត្ថភាពចូលបម្រើការងាររដ្ឋ និងរក្សាប្រាក់ឈ្នួលឱ្យមានភាពប្រកួតប្រជែងជាមួយវិស័យឯកជន។ រដ្ឋាភិបាលក៏បានលើកឡើងពីការកាត់បន្ថយការលើកទឹកចិត្តឱ្យមានអំពើពុករលួយផងដែរ។

គួរបញ្ជាក់ដែរថា តួលេខនេះសំដៅលើប្រាក់បៀវត្ស/កញ្ចប់ប្រាក់ឈ្នួល សម្រាប់តំណែងនយោបាយ មិនមែនជាទ្រព្យសម្បត្តិសរុបរបស់មេដឹកនាំនីមួយៗឡើយ។ លើសពីនេះ ចំណាត់ថ្នាក់អាចប្រែប្រួលតាមប្រភព និងវិធីគណនា ដូចជា ប្រាក់រង្វាន់ ប្រាក់ឧបត្ថម្ភ និងអត្ថប្រយោជន៍ផ្សេងៗ។ ប្រភពដែលបានប្រើសម្រាប់បញ្ជីនេះគឺទិន្នន័យ PoliticalSalaries.com ដែលត្រូវបានផ្សព្វផ្សាយឡើងវិញដោយ Moneycontrol នៅថ្ងៃទី៩ ខែកញ្ញា ឆ្នាំ២០២៦៕