(ភ្នំពេញ)៖ តើអ្នកធ្លាប់ភ្ញាក់ពីដំណេក ហើយមានអារម្មណ៍ថា ដៃរបស់អ្នកស្ពឹក ឬមានអារម្មណ៍ដូចជាម្ជុលរាប់រយកំពុងចាក់ដែរឬទេ?

ជាធម្មតា វាកើតឡើងដោយសារយើងដេកនៅក្នុងទីតាំងមួយយូរ ដែលធ្វើឱ្យមានសម្ពាធលើសរសៃប្រសាទ និងអាចកាត់បន្ថយលំហូរឈាមទៅកាន់តំបន់នោះជាបណ្តោះអាសន្ន។ នេះជាអ្វីដែលគេហៅថា «pins and needles» ឬអារម្មណ៍ស្ពឹក។

នៅពេលយើងផ្លាស់ប្តូរទីតាំង និងដកសម្ពាធចេញ ឈាមអាចហូរត្រឡប់មកវិញ ហើយសរសៃប្រសាទចាប់ផ្តើមបញ្ជូនសញ្ញាឡើងវិញ។ ដូច្នេះ យើងអាចមានអារម្មណ៍ចាក់ៗ រមាស់ ឬស្ពឹកមួយរយៈ មុនពេលដៃត្រឡប់មកធម្មតាវិញ។

ប៉ុន្តែ ការសង្កត់ខ្លាំង ឬយូរខុសធម្មតា អាចមានគ្រោះថ្នាក់។ ក្នុងករណីធ្ងន់ សម្ពាធនៅក្នុងតំបន់សាច់ដុំអាចកើនឡើង រហូតរារាំងលំហូរឈាម និងការផ្គត់ផ្គង់អុកស៊ីសែនទៅសាច់ដុំ និងសរសៃប្រសាទ។ ស្ថានភាពនេះហៅថា «Acute Compartment Syndrome» ហើយអាចបណ្តាលឱ្យខូចសាច់ដុំ និងសរសៃប្រសាទជាអចិន្ត្រៃយ៍ ប្រសិនបើមិនទទួលការព្យាបាលបន្ទាន់។

ដូច្នេះ បើដៃគ្រាន់តែស្ពឹកបន្តិច ហើយអារម្មណ៍នោះបាត់ទៅបន្ទាប់ពីផ្លាស់ប្តូរទីតាំង ជាធម្មតាមិនមែនជារឿងគួរឱ្យភ័យខ្លាចទេ។ ប៉ុន្តែ ប្រសិនបើមាន ការឈឺខ្លាំង ហើមខ្លាំង ដៃតឹង ឬរឹង ស្បែកស្លេក/ត្រជាក់ ស្ពឹកមិនបាត់ ឬមានភាពខ្សោយ និងមិនអាចចលនាដៃបាន គួរស្វែងរកការព្យាបាលបន្ទាន់។

ករណីសិក្សាពីអ្នកជំងឺដែលដេកសង្កត់លើដៃបន្ទាប់ពីស្រវឹងខ្លាំង

មានករណីសិក្សាមួយពីគេហទំព័រ John A. Burns School of Medicine រាយការណ៍អំពីបុរសម្នាក់ដែលបានផឹកស្រាច្រើន ហើយដេកនៅលើដៃក្នុងរថយន្តដឹកទំនិញអស់រយៈពេលយូរ។ ដោយសារតែការស្រវឹង គាត់មិនបានផ្លាស់ប្តូរទីតាំងខ្លួននៅពេលដេក។ គាត់បានកើត compartment syndrome នៅដៃ/កំភួនដៃ ហើយមានការស្លាប់នៃជាលិកាសាច់ដុំ (muscle necrosis) និងខូចមុខងារសរសៃប្រសាទ និងសាច់ដុំជាអចិន្ត្រៃយ៍។

ការសិក្សាលើអ្នកជំងឺ ២៥នាក់

តាមគេហទំព័រ PubMed Central បានបង្ហាញការសិក្សាមួយ ដោយបានពិនិត្យអ្នកជំងឺ ២៥នាក់ដែលមានស្ថានភាពហៅថា Radial nerve palsy បន្ទាប់ពីរក្សាដៃក្នុងទីតាំងមួយយូរ។ ក្នុងចំណោមនេះ 88% នៃករណីពាក់ព័ន្ធនឹងទីតាំងដេក ហើយអ្នកជំងឺភាគច្រើនមានការសង្កត់ប្រហែល ២–៤ ម៉ោង។ រោគសញ្ញាអាចរួមមានដៃស្ពឹក និង Wrist drop មានន័យថាមិនអាចលើកកដៃឡើងបានធម្មតា។ នេះជាភស្តុតាងល្អមួយថា ការដេកក្នុងទីតាំងខុស និងសង្កត់លើសរសៃប្រសាទយូរ អាចបង្កបញ្ហាធ្ងន់ជាងការស្ពឹកបណ្តោះអាសន្ន។

ការកាត់ដៃដោយសារការសង្កត់យូរ

តាមអត្ថបទវិទ្យាសាស្ត្រមួយផ្សាយលើ Oxford Academic មានករណី ដែលការសង្កត់យូរខ្លាំងបណ្តាលឱ្យមានស្ថានភាព Compartment syndrome, Ischemia និងសាច់ដុំស្លាប់ ហើយក្នុងករណីធ្ងន់បំផុត អាចឈានដល់ការកាត់អវយវៈ។ ឧទាហរណ៍ ការសិក្សាមួយរាយការណ៍អំពីករណី Forearm compartment syndrome ពីការសង្កត់យូរដោយសារអ្នកជំងឺមិនអាចផ្លាស់ទីខ្លួន ហើយជាលិកាត្រូវបានបំផ្លាញយ៉ាងធ្ងន់៕