(ភ្នំពេញ)៖ គ្រប់ទារកទាំងអស់នៅពេលកើត ច្បាប់បានកំណត់ថា ស្រ្តីដែលបានសម្រាលទារកនោះថាជាម្ដាយ ប៉ុន្ដែមានករណីមួយចំនួនបានធ្វើឱ្យទារកមិនស្គាល់នូវមាតុភាព ឬ/និងបិតុភាពរបស់ខ្លួនដូចជា ករណីមានបុគ្គលណាម្នាក់ ឬច្រើននាក់បានយកទារកមួយទៅជំនួសទារកមួយផ្សេងទៀត ឬធ្វើការក្លែងទារក ឬធ្វើការលាក់បំបាំងអត្ថិភាពនៃទារក ក្នុងន័យធ្វើឱ្យទារកនោះមិនស្គាល់/បាត់បង់នូវអត្តសញ្ញាណដើម ឬ/និងធ្វើឱ្យទារកនោះបាត់បង់នូវការទទួលបានការថែទាំនិងការគាំពារពីម្ដាយឪពុកបង្កើត/អាណាព្យាបាល ដើម្បីទទួលបានអត្ថប្រយោជន៍ អំពើនោះជាបទល្មើសព្រហ្មទណ្ឌ មានចែងក្នុងក្រមព្រហ្មទណ្ឌ នៃព្រះរាជាណាចក្រកម្ពុជា ដោយត្រូវផ្តន្ទាទោសដាក់ពន្ធនាគារ និងពិន័យជាប្រាក់ ។

តើអ្វីទៅជាបទជំនួស ក្លែង ឬ លាក់បំបាំងអត្ថិភាពនៃទារក?

ដើម្បីឱ្យកាន់តែច្បាស់ សប្តាហ៍នេះកម្មវិធីយល់ដឹងផ្នែកច្បាប់របស់អង្គភាពសារព័ត៌មាន Fresh News សហការជាមួយ ក្រុមហ៊ុនមេធាវីកម្ពុជាសហប្រតិបត្តិការអន្តរជាតិ សូមលើកយកប្រធានបទស្ដីពី «បទជំនួស ក្លែង ឬ លាក់បំបាំងអត្ថិភាពនៃទារក» មកធ្វើការបកស្រាយជូនបងប្អូនប្រជាពលរដ្ឋ សិស្ស និស្សិត ទាំងអស់គ្នា ដូចខាងក្រោម។

អំពើជំនួស ឬក្លែងទារក សំដៅលើការយកទារកមួយទៅជំនួសទារកមួយទៀត ក្នុងគោលបំណងធ្វើឱ្យទារកនោះបាត់បង់នូវអត្ដសញ្ញាណ ឬ/និងមិនស្គាល់អំពីបុត្តភាពរបស់ខ្លួន ឬ/និងធ្វើឱ្យមានការភាន់ច្រឡំលើបុត្តភាព និងសិទ្ធិនៃមាតុភាព ឬ/និងបិតុភាពរបស់បុគ្គលណាមួយ ។ ចំណែកឯ អំពើលាក់បំបាំងអត្ថិភាពនៃទារកវិញ សំដៅដល់អំពើលាក់បំបាំងព័ត៌មានពិតប្រាកដនៃបុត្តភាពរបស់ទារក ដែលធ្វើឱ្យទារកនោះបាត់បង់នូវអត្ដសញ្ញាណ ឬមិនស្គាល់ម្ដាយឪពុកបង្កើត ឬដើម្បីធ្វើឱ្យបុគ្គលដែលមានសិទ្ធិលើមាតុភាព និងបិតុភាពលើទារកនោះ មិនស្គាល់ ឬ/និងបាត់បង់នូវកាតព្វកិច្ចជាម្ដាយឪពុកក្នុងការមើលថែ និងរក្សាកូនរបស់ខ្លួន ជាអាទិ៍ ។

យោងមាត្រា ៣៣៣ នៃក្រមព្រហ្មទណ្ឌ បទជំនួស ក្លែង ឬ លាក់បំបាំងអត្ថិភាពនៃទារក គឺជាអំពើដែលយកទារកមួយជំនួសទារកមួយទៀត ក្លែង ឬលាក់បំបាំងអត្ថិភាពនៃទារក កាលបើអំពើនេះនាំឱ្យមានការក្លែងបន្លំអត្រានុកូលដ្ឋាន ត្រូវផ្តន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ១០០.០០០ (មួយសែន) រៀល ទៅ ២.០០០.០០០ (ពីរលាន) រៀល ។

សរុបជារួម អំពើជំនួស ក្លែង ឬ លាក់បំបាំងអត្ថិភាពនៃទារក ជាអំពើមួយដែលយកទារកមួយជំនួសទារកមួយទៀត ក្លែង ឬ លាក់បំបាំងអត្ថិភាពនៃទារក ក្នុងគោលបំណងក្លែងបន្លំអត្រានុកូលដ្ឋាន (បុត្តភាព ឬមាតុភាព ឬបិតុភាព) ជាបទល្មើសព្រហ្មទណ្ឌ ដែលមានចែងក្នុងក្រមព្រហ្មទណ្ឌ នៃព្រះរាជាណាចក្រកម្ពុជា ដោយត្រូវផ្តន្ទាទោសដាក់ពន្ធនាគារ និងពិន័យជាប្រាក់ ៕

រៀបរៀងដោយ៖ លោកមេធាវី ប៉ូល គីមសេង និងកញ្ញា ថន រ៉ាវ៉ាឌី ជាសមាជិកក្រុមការងាររៀបចំ និងផ្សព្វផ្សាយអត្ថបទច្បាប់នៃ ក្រុមហ៊ុនមេធាវីកម្ពុជាសហប្រតិបត្តិការអន្តរជាតិ មានអាសយដ្ឋាននៅអគារ ស៊ីអាយស៊ី (CIC) លេខ ១២៦៥ ផ្លូវលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ទូរសព្ទទំនាក់ទំនងលេខ ០២៣ ៩៨៦ ២៤៥ / ០១៧ ៥៤១ ៥៣១ អ៉ីម៉ែល [email protected] គេហទំព័រ https://cicfirm.com ហ្វេសប៊ុកផេក Cambodia International Cooperation Law Firm