(ភ្នំពេញ)៖ នៅតាមបណ្ដាលស្ថាប័នរដ្ឋ ឬក្រុមហ៊ុនឯកជន ដែលស្ថិតនៅក្រោមវិសាលភាពនៃច្បាប់ស្តីពីការងារ សុទ្ធសឹងតែមានការចុះកិច្ចសន្យាការងាររវាងភាគីនិយោជក និងភាគីកម្មករនិយោជិត ដោយការចុះកិច្ចសន្យានេះបានចងភ្ជាប់នូវកាតព្វកិច្ចជាច្រើនដែលតម្រូវឱ្យកម្មករនិយោជិតបំពេញឱ្យនិយោជក និងនិយោជកត្រូវផ្តល់ឱ្យទៅកម្មករនិយោជិតវិញទៅតាមលក្ខខណ្ឌដែលមានកំណត់នៅក្នុងកិច្ចសន្យាការងារ ។

កម្មករនិយោជិតត្រូវបំពេញការងារទៅតាមកិច្ចសន្យាការងាររបស់ខ្លួន ក៏ប៉ុន្តែ ប្រសិនបើករណីដែលកម្មករនិយោជិតត្រូវបានជាប់កាតព្វកិច្ច ដោយមានមូលហេតុណាមួយ តើកម្មករនិយោជិតអាចធ្វើការព្យួរនូវកិច្ចសន្យាការងាររយៈពេលខ្លីបានដែរឬទេ? តើនៅក្នុងច្បាប់ស្ដីពីការងារ បានកំណត់អំពីមូលហេតុនៃការស្នើសុំព្យួរកិច្ចសន្យាការងារដែរឬទេ?

ដូច្នេះដើម្បីយល់ដឹងឱ្យបានកាន់តែច្បាស់អំពី «ការព្យួរកិច្ចសន្យាការងា» កម្មវិធីយល់ដឹងផ្នែកច្បាប់របស់អង្គភាពសារព័ត៌មាន Fresh News ដែលសហការជាមួយ ក្រុមហ៊ុនមេធាវីកម្ពុជាសហប្រតិបត្តិការអន្តរជាតិ នៅក្នុងសប្តាហ៍នេះ នឹងធ្វើការបង្ហាញជូនបងប្អូនប្រជាពលរដ្ឋ សិស្ស និស្សិត ដូចខាងក្រោម។

ក្នុងកិច្ចសន្យាការងារតែងតែកំណត់អំពីសិទ្ធិ និងកាតព្វកិច្ចរបស់ភាគី រួមទាំងអត្ថប្រយោជន៍ផ្សេងៗ ហើយភាគីនៃកិច្ចសន្យា អាចព្យួរនូវកិច្ចសន្យាការងារបាន ត្រូវតែមានមូលហេតុជាក់លាក់ណាមួយ និងសមស្របទៅតាមច្បាប់ ។

បើយោងតាមច្បាប់ស្ដីពីការងារ មាត្រា ៧១ បានបញ្ញត្តថា កិច្ចសន្យាការងារ ត្រូវព្យួរដោយមូលហេតុដូចខាងក្រោម៖

*១៖ ការបិទគ្រឹះស្ថាន ដោយហេតុនិយោជកត្រូវបំពេញកាតព្វកិច្ចការពារមាតុភូមិ ឬក្នុងរយៈពេលជាកាតព្វកិច្ចត្រូវរៀនវិជ្ជាយោធា ។
*២៖ អវត្តមាននៃកម្មករនិយោជិត ក្នុងពេលត្រូវបំពេញកាតព្វកិច្ចការពារមាតុភូមិ និងក្នុងរយៈពេលជាកាតព្វកិច្ចត្រូវរៀនវិជ្ជាយោធា ។
*៣៖ អវត្តមាននៃកម្មករនិយោជិតក្នុងករណីមានជម្ងឺ ដែលមានគ្រូពេទ្យផ្លូវការបានបញ្ជាក់ត្រឹមត្រូវ ។ ថិរវេលាអវត្ត មា ន នោះត្រូវមានកំណត់ត្រឹមប្រាំមួយខែ ប៉ុន្តែអាចពន្យាររហូតដល់មានអ្នកជំនួស ។
*៤៖ ពេលអាក់ខានធ្វើការដោយហេតុមានគ្រោះថ្នាក់ការងារ ឬមានជម្ងឺក្នុងវិជ្ជាជីវៈ ។
*៥៖ ការឈប់សម្រាកដែលបានអនុញ្ញាតឱ្យស្រ្តីជាកម្មករនិយោជិត ក្នុងឱកាសមានគភ៌ និងសម្រាលកូន ព្រមទាំងមានជម្ងឺបណ្ដាលមកពីការសម្រាលកូន ។
*៦៖ អវត្តមាននៃកម្មករនិយោជិត ដែលនិយោជកបានអនុញ្ញាតតាមច្បាប់តាមការព្រមព្រៀងរួម ឬការយល់ព្រមរៀងខ្លួន ។
*៧៖ ការបញ្ឈប់កម្មករនិយោជិតក្នុងរយៈពេលដោយមានមូលហេតុសមស្របតាមបទបញ្ជាផ្ទៃក្នុង ។
*៨៖ អវត្តមាននៃកម្មករនិយោជិតក្នុងឱកាសឈប់សម្រាកដោយមានប្រាក់ឈ្នួលដោយគិតបន្ថែមទាំងថិរវេលាធ្វើដំ ណើរ ជាយថាហេតុផង ។
*៩៖ ការឃាត់ខ្លួននៃកម្មករនិយោជិត ដែលមិនបណ្ដាលឱ្យជាប់ពិរុទ្ធ ។
*១០៖ ប្រធានសក្ដិដែលបណ្ដាលឱ្យភាគីណាមួយបំពេញកាតព្វកិច្ចមិនបានក្នុងរយៈពេលមិនលើសពីបីខែ ។
*១១៖ ពេលណាដែលសហគ្រាសជួបការលំបាកផ្នែកសេដ្ឋកិច្ច ឬសម្ភារៈធ្ងន់ធ្ងរ ឬការលំបាកជាពិសេសណាមួយ ដែលនាំឱ្យព្យួរសកម្មភាពសហគ្រាសមិនលើសពីពីរខែ។ ការព្យួរសកម្មភាពនេះ ត្រូវដាក់ឱ្យស្ថិតនៅក្រោមការត្រួតពិនិត្យ របស់អធិការការងារ ។

និយោជកនឹងអាចបញ្ចប់ការព្យួរកិច្ចសន្យាការងារបាន លុះត្រាណាតែបុព្វហេតុទាំងឡាយនៃការព្យួរកិច្ចសន្យានេះបានផុតរលត់ហើយ លុះត្រាណាតែនិយោជកបានឱ្យដំណឹងមុនតាមច្បាប់ទៀតផង ។

ការព្យួរកិច្ចសន្យាការងារ គឺមានលក្ខខណ្ឌច្រើនសម្រាប់ការព្យួរ ប៉ុន្តែត្រូវអនុលោមទៅតាមច្បាប់ដែលបានកំណត់ និងមានមូលហេតុជាក់លាក់ណាមួយ ដោយមិនបំពាននូវច្បាប់ ឬមិនលើសពីអ្វីដែលច្បាប់បានកំណត់នោះទេ ។ ការព្យួរកិច្ចសន្យាការងារ គឺមិនត្រូវធ្វើឱ្យមានការប៉ះពាល់ដល់ផលប្រយោជន៍ និងសិទ្ធិ ឬកាតព្វកិច្ចណាមួយរបស់និយោជក និងកម្មករនិយោជិតនោះទេ ។

បើយោងតាមមាត្រា ៧២ នៃច្បាប់ស្ដីការងារ កថាខណ្ឌទី១ បានចែងថា ១-ការព្យួរកិច្ចសន្យាការងារ នាំឱ្យប៉ះពាល់ចំពោះតែកាតព្វកិច្ចសំខាន់ៗនៃកិច្ចសន្យាការងារ ពោលគឺកាតព្វកិច្ចដែលកម្មករនិយោជិតត្រូវធ្វើការឱ្យ និយោជក និងកាតព្វកិច្ចដែលនិយោជកត្រូវផ្តល់ប្រាក់ឈ្នួលដល់កម្មករនិយោជិត លើកលែងតែមានបទប្បញ្ញត្តិផ្ទុយដែលកំណត់ឱ្យនិយោជកផ្តល់ប្រាក់ឈ្នួលឱ្យកម្មករនិយោជិត ។

ហេតុដូច្នេះ ការអនុវត្តនូវការព្យួរនូវកិច្ចសន្យាការងារ ត្រូវមានភាពច្បាស់លាស់ និងត្រឹមត្រូវតាមច្បាប់ដែលបានកំណត់ និងមិនមានការប៉ះពាល់ដល់នូវកាតព្វកិច្ចរបស់ភាគីណាមួយនៃកិច្ចសន្យាការងារនោះទេ ។ ការព្យួរកិច្ចសន្យាការងារ ត្រូវអនុលោមតាមច្បាប់ និងមានការកំណត់នូវពេលវេលាជាក់លាក់ ។

សរុបមក និយោជក ឬកម្មករនិយោជិត អាចធ្វើការដាក់ព្យួរកិច្ចសន្យាការងារបាន ប្រសិនមានជាប់នូវកាតព្វកិច្ចណាមួយ និងការសម្រាកលំហែមាតុភាព ដូចដែលមានកំណត់នៅក្នុងមាត្រា ៧១ និងមិនប៉ះពាល់ដល់កាតព្វកិច្ចណាមួយរបស់ភាគីនៃកិច្ចសន្យាការងារ ដូចមានកំណត់នៅក្នុងមាត្រា ៧២ នៃច្បាប់ស្ដីពីការងារ ខាងលើនេះ ។

រៀបរៀងដោយ៖ លោកមេធាវី ម៉េង វណី្ណ និងកញ្ញា ហេង មរកត ជំនួយការមេធាវី និងជាសមាជិកក្រុមការងាររៀបចំ និងផ្សព្វផ្សាយអត្ថ បទ ច្បាប់ នៃក្រុមហ៊ុនមេធាវីកម្ពុជាសហប្រតិបត្តិការអន្តរជាតិ មានអាសយដ្ឋាននៅអគារ ស៊ីអាយស៊ី (CIC) លេខ ១២៦៥ ផ្លូវលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ទូរស័ព្ទទំនាក់ទំនងលេខ ០២៣ ៩៨៦ ២៤៥ / ០៧៨ ២៧២ ៧៨៦ អ៉ីម៉ែល៖ [email protected] គេហទំព័រ៖ www.cicfirm.com ហ្វេសប៊ុកផេក៖ Cambodia International Cooperation Law Firm ៕